He tino pukumahi ki te mahi toi

2022-06-24T07:00:00.0000000Z

2022-06-24T07:00:00.0000000Z

NZME

https://communitynews.co.nz/article/281792812704825

KI ROTORUA

He tangata hōroi whareiti, he tangata hōroi pātara, he ringa wera ka oti ana he pou tuitui pūeru, anei ētehi o āna mahi hai tētehi wahine tino mōhiotia ana e te iwi mō āna mahi tā moko, ara ko Henriata Nicholas, nā aua takahanga katoa i tae tika ai ia ki tōna nōhanga nei. “Nōku e itiiti ai tino mōhio ai ahau he wairua toi ki taku poho, he ahakoa e kūare ana i taua wā, he mōhio nōku tāria te wā ka puta mai taku tino hiahia”. He uri nō Ngāti Whakaue, whai pānga ai hoki ki a Ngāti Turumakina, ki a Ngāti Unu me Ngāti Kahu, he wahine noho marae. “Ko tā mātou mahi i Paratehoata he hōroi whareiti, kai te taringa tonu ngā whakahau a ngā mātua ki a mau ki a kotou ake, ‘pinnies’ ki ngā pēke ki a tika ai ā mātou mahi i te marae. Ka nui taku noho i Tapiti i Ohinemutu i Te Mahau me Te Kopua he marae katoa wēnei. Māori kau te noho. I whānau ai, i kuraina ai i te takere waka o Te Arawa nā tōna kuia ia i ako ki te raranga i te New Zealand Maori Arts & Crafts koia tētehi o ngā ākonga a Emily Schuster. “Nā tēnā wā tonu ko te noho tahi me ngā kuia i ū ai te mauri o te toi ki roto ki ahau mō te wehi kai a rātou, me te whakarākei, kai a rātou, koina taku hiahia, he aroha ki te kaupapa, ki te whakaniko, ki ngā kame, ki te waihanga ka oti ana he taonga whakahirahira”. Nā tēnei hoki i pūāwai mai tona aroha nui ki te whakairo. “Nā taku nohonoho i taua wāhi i tuwhera katoa ōku kanohi ki ngā kaupapa toi o tātou te Māori, engari te whakairo , kai reira te hiahia, e noho ana, e whakarongo ana e titiro atu ana ki ngā tauira e whakairo ana me ngā tini whakaniko hoki. Ka reka katoa ki ahau te kakara o te paru, wheoi anō rā ko te harikoa e pupū ake ana i ngā whatumanawa o ngā tauhou e mātakitaki haere ana i ngā tohunga nā”. Nāna e mahi ana ka eke ai āna pūkenga ki tētehi taumata rangatira, kātahi ia ka tahuri ai ki tētehi karaehe mahi toi i Waiariki. “Nāku tonu i utu kia ea ai te nama, e ako ana, e mahi ana. Ko taua tau tonu i tino whānui hoki ai ngā whakaaro ōku o te ao toi Māori me te toi hou, inā rā he mana tō te ahumahi, he mana tō te ao whakanikoniko, whaihoki te ao kāone, ka whakawhiti ao ahau e whia kē ngā taima. Mai i reira ka noho ahau hai pou whakanikoniko mō ngā tau e rima mō tētehi kamupene pūeru i Rotorua, he noho, he ako tonu ki a mātau ai ahau ki ngā wāhanga katoa , nā reira ka tupu anō taku kete mātauranga nā wai rā ka mōhio ahau ki te mahi waitohu me te whakarākei pukapuka engari tūturu a Māori nei. “Nō tēnei wā tonu ka pupū ake ai te hiahia ki te whakawhiti ki te tuhi tapeha tangata. Kua kite noa ahau i taku tuakana me etehi o ona hoa whakairo e whakaora ana i te tā moko i te wā o te waru tekau, ka nui taku whakamiharo e titiro ana ki te tapeha e korikori ana, nā reira i hū nuku ahau ki Tamaki i te tau kotahi mano e iwa rau, e iwa tekau mā rima. Ka noho tauira ahau ki taku tuakana, koia te iti e hāpai ana i tēnei momo i taua wā me te mea hoki kāore e tino pai ana ki ētehi o ngā tāne ki a noho mai he wahine ki te ako i tēnei āhuatanga”. Wheoi anō e ako ana, e mahi ana anō a Henriata ko tana mahi he mahi toi whakanikoniko . Ka hipa ngā tau e rima kua piki ia ki te taumata pou rangatira ka tahuri ia ki ngā wānanga moko puta noa i te motu ia mutunga wiki, ā , me ngā wā wātea hoki. Kātahi ia ka kite i tona tuakana e mahi uhi ana, nā, kua puta hoki ki a ia te hiahia. Ko te orokohanga mai tēnei o te kaupapa Te Uhi o Mataora. “I te whakaterenga o Te Uhi i Takaparawhā i Orakei i Tamaki Makaurau ka tūtaki ahau ki a Keone Nunes me Vaughan Victor e mahi kakau ana. Ko taku whanaunga te tupapaku e takoto ana taku kitenga atu i a ia ka tae te mōhiotanga kia tāhuri ahau ki te ako i tēnā puna mātauranga. Ka nui te whakaaetanga a Keone ki te ako i a ia me te hanga i ngā taputapu . Ka puta i a ia te pātai, “taku take ki te ako ?”, ko tāku kia whakawhanake ake i taku puna kia tūhaina ki te mārea. Mō ngā tau e rua ka tono pūtea ai ahau ki a noho ākonga ahau ki a Keone me ngā tauira āna. I te tau e rua mano mā toru ka whakaaengia taku tono e Creative New Zealand ka haere au ki Hawaii ako ai mō ngā marama e toru. I te tau e rua mano mā whā, ka tīmatangia taku pūhoro tuatahi ā tāne hoki me aku uhi, nā ko Ngahuia Te Awekotuku taku pou awhina, he wherawhera i te tapeha kia tika ai taku uhi, ko Waimarie Nikora te wahine hopu ripene, me te tini o te māramatanga i puta mai. Kua pau ngā tau e rua tekau, nōku te waimaria kua noho ahau me ngā tini rangatira o te ao, e whakapono nei ki taku mahi me aku pukenga tā moko,kauwae mai he aha noa atu me ngā tini whakakitenga hoki kua tae kē ahau”. E noho tahi ana a Henriata me tana mākau a Marc Lenton ki tua tata o ngā ana o Waitomo. Ko te pae tawhiti he whakarite mai i te rautaki e ora ai tēnei tū āhuatanga kia noho hoki , kia mahi hoki ia i tōna ake kāinga i Waitomo. “E marino ai te wairua ko te whenua taku hiringa, ā runga, ā raro hoki”.

en-nz