He mārama kehokeho noa tana titiro pae tawhiti

2022-05-13T07:00:00.0000000Z

2022-05-13T07:00:00.0000000Z

NZME

https://communitynews.co.nz/article/281715503209761

KĀHU KI ROTORUA

Kia eke ai tōna whānau, tōna hapū me tōna iwi ki te tarouma o Takurua te pūtake e wāwāhi ngaru teitei tonu ai te wairua kaha o Kerri Anne Hancock. Ko ia te tauwharenga mō te tarati o Te Rotoiti 15. Tētehi o ngā tarati ahuwhenua momona katoa o Aotearoa. Nā tana tūnga mahi e tika ai tāna tuku kaha kia rangatira ai tēnei moemoeā ōna. Nāna te ara kōpiupiu hoki, nō te rua mano mā rima te tau e noho ākona ana ki a Tai Taitoko i te tarati Maori whaihoki e noho tahi ana me te whānau i te kooti whenua Maori ki Te Waiariki nei.” Kua hua mai te pōhewatanga nōku kia hoki mai ahau ki te awhina me te whakarongo ki ngā whakahau ā te iwi, mātua i taku tūnga nei i te tarati o Te Rotoiti 15. I ngā tau kotahi tekau mā whitu kua pahemo, kua uru atu ahau hai pou whakarite mā ngā take e pā ana ki te tiriti o Waitangi mā te Karauna me tōku iwi mō Ngāti Whakaue, whaihoki kai te hautu tonu ahau i taku ake kamupene mātanga. Nā ēnei mahi katoa, kua mārama ahau me pēwhea e whakatutuki ai i aku mahi hai manu tūtei mā te tarati – engari tonu e hoa mā, he rā hou, he ākoranga hou”. I whakatūngia te tarati o Te Rotoiti 15 i te tau kotahi mano, e iwa rau, e whitu tekau mā tahi te tau. He mea whakakōtahi i ngā poraka Maori e whitu. Ko ngā whenua ēnei nō Ngāti Tarawhai, Ngāti Rongomai me ētehi hapū hoki o Ngāti Pikiao tāpiringia hoki ētehi atu whenua whiti nā te Karauna. Ko mātou ngā tarati te hunga tiaki i ngā heketā e waru mano e whā rau mā ngā tangata kotahi tekau mā ono mano. Ko te kitenga whakamua kia hihiri te ōhanga, te oranga me te pukumahi i runga i te ngākau ngātahi. E toru tekau mā whitu te rahi o Kerri Anne (nee Rogers) he ākona tawhito nā Hato Mikaere me te kura o Hoani Paora. Ko ētehi o ōna pānga whakapapa ki a Ngāti Rangiwewehi ki a Ngāti Tarawhai me Ngāti Whakaue hoki. Tokotoru a rāua ko tona hoa rangatira a Michael Hancock, he Ngai Te Arawa, he Ngai Te Rangi me Ngāpuhi, tamariki Ko Maraea te mātāmua, e waru tōna rahi, ko Justin te pūmanawa, e ono tōna rahi, ā, ko Te Waere te whakapakanga, e toru noa te rahi. He tāhū paetahi mahi a Toi Maori me te mātai hinengaro i Te Whare Wānanga o Tāmaki Makaurau engari anō kāore he mutunga o tana akoako. “Ko te ūpoko o te ururoa, me e whai mana nei taku tūnga mahi ki te whakahuri, ki te waha i ngā kareā-roto e rangatira ai taku whānau, taku hapū me taku iwi, he tika rā. He kitenga nāku me e mahi ana mā te iwi ka ara anō ai he huarahi māku e whakawhanake aku hononga ki te whenua, ki te taiao otīā taku whānau whānui”. He ākona reo ia pēnei i te nuinga o tōna whakatupuranga nā te whare wānanga. Nā te mea ko te reo Maori tona reo tuarua kua mōhio a Kerri me noho mātua te reo ki āna tamariki, kia takahia e rātou ngā tapuwae o tō rātou Matua tāne e noho Maori ana i te ao mātauranga, nā reira a rātou tamariki e rūmakingia ana ki te reo i te kāinga. “A mahi nei, nōku te maringi nui kua whai wāhi ai ahau ki te kaupapa Rotorua Reorua me te kaupapa Aotearoa Reorua, otīā me te whakahaere tētehi akoranga reorua ā pākihi i taku tūnga Tauwharenga nei mā te tarati o Te Rotoiti 15”. “Ko te pae tawhiti tāku e matapoporengia nei kia Maori kau tō tātou reo, e pakē kau ana ngā waha o ngā tamariki me ngā mokopuna he ahakoa ki whea haere ai rātou i te motu nei, ka rua, kia eke anō ai te mana o te reo kia noho taurite ai ki te reo Pākehā.” Ko tana titiro mā tana tūnga taratī nei, kia whakamihingia e ia te kaha o ngā whānau o ngā hapū me ngā iwi ki te whakakōtahi ngā whenua Maori e whai kaha ai tātou ināianei e whai tūranga mana ai tātou i ēnei rangi tonu, hai waka kotahi. “Ko ngā pou tumuwhakarae tawhito nō te tau kotahi mano, e iwa rau, e whitu tekau mā tahi moroki noa nei, he rahi noa atu te hunga tangata kua tuku aroha mai ki tō tātou whenua e tiketike ai te kōrūrū o tō tatou whare, anei e whēterotero ana”. He mārama kehokeho noa tana titiro pae tawhiti. Ko ngā tamariki me ngā mokopuna te āpōpō. “Ko ngā whakatau ka puta mai me whakatau-mokopuna kē te whakaaro me manawa uho tātou ki te tuku ki te whakaputa i ngā whakataunga toa hai painga mō tātou mō te iwi”. Kia hoki mai ki tāna ake mahi, hai tā Kerri Anne, he wahine rite kaha nei ki te pepeha e mea ana ko te amorangi ki mua, engari a Kerri koia te hāpai ō ki muri. “He tino waimarie i whakawhiwhia ai ahau ki te taonga Emerging Leaders i te tau e rua mano kotahi tekau mā iwa i te Westpac Rotorua Business Awards. I te tau e rua mano e rua tekau mā tahi ka whakawhiwhia te taratī o Te Rotoiti 15 ki te Tompkins Wake Bi-lingual Business Award, kātahi ka eke ai rātou hai pouwhakataetae whakamutunga i te wahanga Not for Profit hoki. —Na Raimona Inia tenei purongo i whakamaoritia

en-nz